Молитва 1-я
О Пресвятая Госпоже Владычице Богородице! Возбвигни нас, раб Божиих
(имена) из глубины греховныя и избави нас от внезапныя смерти и от
всякаго зла. Подаждь, Госпоже, нам мир и здравие и просвети нам ум
и очи сердечныя, еже ко спасению, и сподоби ны, грешныя рабы Твоя,
Царствия Сына Твоего, Христа Бога нашего: яко держава Его благословенна
со Отцем и Пресвятым Его Духом.
Молитва 2-я
Пресвятая Дево, Мати Господа, покажи на мне, убозем, и рабах Божиих
(имена) древния милости Твоя: низпосли дух разума и благочестия, дух
чистоты и правды. Ей, Госпоже Пречистая! Милостива мне буди зде и
на Страшнем Суде. Ты бо еси, Госпоже, слава небесных и упование земных.
Аминь.
Молитва 3-я
О Пресвятая Госпоже, Владычице Богородице! Призри с высоты святыя
Твоея на нас, раб Божиих (имена), и помози нам немощным, утоли скорби
наша, настави на путь правый; уврачуй болезненныя сердца наша, даруй
нам прочее время жития нашего в мире и покаянии проводи; подаждь христианскую
кончину и на Страшнем Суде Сына Твоего явися нам милосердая предстательница,
да всегда славим Тя со всеми угодившими Богу во веки веков.
Молитва 4-я
О Пресвятая Госпоже, Владычице Богородице! Приими недостойную молитву
нашу и сохрани нас, раб Божиих (имена), от навета злых человек и от
внезапныя смерти и даруй нам прежде конца покаяние. На моление наше
умилосердися и радость вместо печали даруй. И избави нас, Госпоже,
от всякия беды и напасти, скорби и болезни и от всякаго зла. И сподоби
ны, грешныя рабы Твоя, одесную стати во втором пришествии Сына Твоего,
Христа Бога нашего, и наследники быти Царствия Небеснаго и жизни вечныя
со всеми Святыми в безконечныя веки веков.
Молитва 5-я
О Царице Богородице, Христа Бога нашего Мати! Услыши ны и избави нас,
раб Божиих (имена) от всякия скорби и печали, огради от всякия напасти
и злых клевет и от неправеднаго и лютаго навета вражия. Можеши бо,
о Благодатная Мати Божия, не точию от всякаго зла сохранити люди Твоя,
но и всяким благодеянием снабдити их и спасти: разве Тебе, иныя Ходатаицы
о нас грешных, не имамы к Сыну Твоему, Егоже умоли, Владычице, да,
спасеннии Тобою, славим Сына Твоего и Бога нашего, купно со Отцем
и Святым Духом, ныне и в безконечныя веки.
Молитва 6-я
Яко необоримую стену и источник чудес, стяжавше Тя раби Твои, Богородице
Пречистая, сопротивных ополчения низлагаем. Темже молим Тя: мир приходу
Твоему даруй и душам нашим велию милость.
Молитва 7-я
О Всемилостивая Госпоже, Дево Богородице! Вонми смиренному молению
нашему, вознеси к Сыну Твоему и Богу нашему матернее Твое моление
о рабах Божиих (имена), да не отвержет нас грешных от лица Своего,
но, яко милостив, да простит нам согрешения наша вольная и невольная,
да сохранит нас от соблазнов мира, от козней диавольских и от нападения
видимых враг, да сотворит нам дни благи и безмятежны, яко благ Господь,
от всея твари со Отцем и Святым Духом славимый во веки веков.
Пресвятая Богородице, спаси нас!
О Пресвятая Госпоже, Владычице моя Богородице, Небесная Царице! Спаси
и помилуй мя, грешнаго раба Твоего, и раб Божиих (имена) от напрасныя
клеветы, от всякия беды и напасти и внезапныя смерти. Защити мя, Владычице
Богородице, от всех враг моих видимых и невидимых и от всякаго злаго
обстояния.
О Пресвятая Госпоже, Владычице Дево Богородице! Приими недостойную
молитву мою и сохрани мя и раб Божиих (имена) от внезапныя смерти
и даруй ми и рабам Божиим (имена) прежде конца покаяние.
Пресвятая Богородице, спаси нас!
Ты мне хранительница жизни всея явися, Пречистая; Ты мене избави от
бесов в час смерти; Ты и по смерти мене упокой.
Молитва 8-я
Царице моя Преблагая, надеждо моя Пресвятая, бедствующих помоще и
озлобляемых покрове! Зриши мою напасть, зриши мою скорбь; отовсюду
искушением одержим есмь и заступающаго несть у мене. Ты убо Сама помози
ми яко немощну, направи мя яко странна, настави яко заблуждша, уврачуй
и спаси яко безнадежна. Призри убо на нас, грешных раб Божиих (имена)
и покрый нас пресвятым омофором Твоим, да избавлени будем от зол,
нас обышедших, и восхвалим всегда препетое Имя Твое.
Молитва 9-я
О, милостивая и премилостивая Госпоже Царице Богородице! Ты, яже восхощеши,
вся испросити от Сына Твоего Христа Бога нашего можеши: не отрини
убо нас, раб Божиих (имена), от Твоего заступления, подаждь свобождение
от бед и скорбей наших и избави нас, раб Божиих (имена), Всенепорочная,
от видимых и невидимых враг и от злых человек, клевещущих на ны, и
моли Сына Твоего и Бога нашего, яко да в день Суда одесную поставит
ны, ради Твоего предстательства. Тому слава и держава, со Безначальным
Его Отцем и Святым Духом, ныне и присно и во веки веков.
Молитва 10-я
О Пресвятая Владычице Богородице! Призри с благосердием на моления
нас, грешных (имена), и не отврати лица Твоего от нас за множество
прегрешений наших, но простри нам руце матернего милосердия Твоего
и сотвори с нами (имена) знамение во благо. Яви нам богатую помощь
Твою и благопоспеши во всяком деле блазе; от всякаго же начинания
греховнаго и помышления лукаваго отврати нас, да всегда славим пречестное
Имя Твое.
Молитва 11-я
Мати Господа небесе и земли, даждь нам, рабам Твоим (имена) вся полезная
ко спасению; огради нас святыми ангелы от всех бед; христианскую кончину
жития нашего мирну и непостыдну исходатайствуй нам и, по исходе от
временныя жизни сия, помози нам безбедно прейти вся воздушныя мытарства
миродержителя тьмы века сего и в райских обителех со избранными вселитися
нам сподоби, да во светлостех Святых воспеваем великолепое имя Отца
и Сына и Святаго Духа, ныне и присно и во веки веков.
Молитва 12-я
Пресвятая Госпоже, Владычице Богородице! Услыши и помилуй ны, грешныя
и недостойныя рабы Твои (имена), умоли, Милосердая Владычице, Сына
Твоего и Господа нашего Иисуса Христа, да отвратит от нас праведный
гнев Свой, да простит грехи и беззакония наша, яко да сподобимся благостию
Его скончати житие наше в покаянии и получити милость Его со всеми
избранными Его: яко благословенна и препрославленна еси во веки веков.
Молитва 13-я
Богорадованная Владычице, Всемилостивая о всем мире Ходатаице! Прилежно
раби Твои ко Твоему предстательству прибегаем: молитву теплую Сыну
Твоему и Богу нашему сотвори о рабех Божиих (имена), да от всяких
болезней и печалей нас, Тебе ради, избавит, и от грехов всяких свободив,
Царствия Своего Небесного наследники ны покажет; велие бо и неизреченное,
яко Мати, к нему дерзновение имаши и вся от Него испросити можеши,
Едина во веки Преблагословенная.
Молитва 14-я
Заступнице Усердная, Мати Господа Вышняго! За всех молиши Сына Твоего,
Христа Бога нашего, и всем твориши спастися в державный Твой покров
прибегающим. Всех нас (имена) заступи, о, Госпоже Царице и Владычице,
иже в напастех и в скорбех, и в болезнех, обремененных грехи многими,
предстоящих и молящихся Тебе умиленною душею и сокрушенным сердцем
пред Пречистым Твоим образом со слезами, и невозвратно надежду имущих
на Тя избавление всех зол, всем полезная даруй и вся спаси, Богородице
Дево: Ты бо еси Божественный покров рабом Твоим.
Молитва 15-я
О Пресвятая Госпоже, Владычице Богородице! Смиренно припадающе, молим
Тя: (просьба) и не затвори нам, грешным, щедрот Твоих, избави нас
(имена) от падения греховнаго, от навета злых человек, от скорбей
и бед, от внезапныя смерти и вечных мук и даруй нам дух сокрушения,
смирение сердца, чистоту ума и оставление прегрешений, да вси мы,
благодарно Тя воспевающи, сподобимся Небеснаго Царствия и тамо со
всеми святыми да славим пречестное и великолепое имя Отца и Сына и
Святаго Духа во веки веков.
Молитва 16-я
Заступнице усердная, Мати Господа Вышняго! Призри ныне с высоты святыя
Твоея на нас, раб Божиих (имена), и покажи на нас чудныя милости Твоя:
избави нас от всякия скорби, настави на путь всякия добродетели и
благостыни, спаси от искушений, бед и болезней. Не имамы бо ни иныя
помощи, ни иного предстательства, ни утешения, токмо Тебе, о Мати
всех скорбящих и напаствуемых. Ты по Бозе наша Надеждо и Заступнице
и, на Тя уповающе, сами себе, и друг друга, и всю жизнь нашу Тебе
предаем во веки веков.
Молитва 17-я
О Премилосердая Госпоже, Царице Богородице! Приими смиренное моление
наше, не отрини нас и не возгнушайся нас, недостойных, но яко Милосердая
Мати, не престани молящи, Егоже родила еси, да дарует нам прощение
многих согрешений наших, да спасет нас имиже веси судьбами. Помилуй
нас, Владычице, помилуй нас, несть бо нам спасение от дел. Даруй нам
умиление, покаяние и сокрушение сердечное. Сподоби нас по вся дни
жизни нашея творити волю Сына Твоего и Бога нашего и во всем благоугождати
Ему Единому. В смерти же час, Пресвятая Дево, избави нас (имена) от
власти бесовския и осуждения, и ответа, и страшнаго испытания, и мытарств
горьких, и огня вечнаго, да сподобльшеся Цар ствия Божия, величаем
Тя и славим воплощшагося от Тебе Христа Бога нашего, Емуже слава со
Отцем и Святым Духом, ныне и присно и во веки веков.
Молитва 18-я
О Пресвятая Госпоже, Владычице Богородице! Приими недостойную молитву
нашу и сохрани всех нас, раб Божиих (имена), от навета злых человек
и от внезапныя смерти и даруй нам прежде конца покаяние, и умягчи
злая сердца наша. Укрепи в нас правую веру, вложи в сердца наша дух
страха Божия, дух благочестия, дух смирения, терпения и любве, в добрых
делех преуспеяние: избави же нас, раб Божиих (имена) от искушений,
развращения и погибели вечныя. И сподоби ны одесную стати Сына Твоего,
Христа Бога нашего, во втором Его пришествии и наследники быти Царствия
Небеснаго и жизни вечныя со всеми святыми в безконечныя веки веков.
Молитва 19-я
К кому возопием, Владычице; к кому прибегнем в горести нашей, аще
не к Тебе, Царице Небесная; кто плач наш и воздыхание приимет, аще
не Ты, Пренепорочная, надеждо христиан и прибежище нам, грешным. Кто
паче Тебе в милости: приклони ухо Твое к нам, Владычице, Мати Бога
нашего, и не презри требующих Твоея помощи: услыши стенание наше,
подкрепи нас, грешных, вразуми и научи, Царице Небесная, и не отступи
от нас, раб Твоих, Владычице, за роптание наше, но буди нам Мати и
Заступница и вручи нас милостивому покрову Сына Твоего: устрой нас,
како угодно будет святей Твоей воле и приведи нас, грешных, к тихой
и безмятежной жизни, да плачемся о гресех наших, да возрадуемся же
с Тобою всегда, ныне и присно и во веки веков.
Молитва 20-я
Заступнице земли Российстей и непрестанная за нас молитвеннице, мир
приходу и душам нашим у Господа испроси, да святится в нас имя Божие
во веки.
Молитвы на каждый день