Иерей: Благословен Бог наш, всегда, ныне и присно и во веки веков.
Чтец: Аминь. Слава Тебе, Боже наш, слава Тебе.
Царю Небесный, Утешителю, Душе истины, Иже везде сый и вся исполняяй,
Сокровище благих и жизни Подателю, прииди и вселися в ны, и очисти
ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков.
Аминь.
Пресвятая Троице, помилуй нас; Господи, очисти грехи наша; Владыко,
прости беззакония наша; Святый, посети и исцели немощи наша, имене
Твоего ради.
Господи, помилуй. (Трижды) Слава и ныне:
Отче наш, Иже еси на небесех! Да святится имя Твое, да приидет Царствие
Твое, да будет воля Твоя, яко на небеси и на земли. Хлеб наш насущный
даждь нам днесь; и остави нам долги наша, якоже и мы оставляем должником
нашим; и не введи нас во искушение, но избави нас от лукаваго.
Иерей: Яко Твое есть Царство...
Чтец: Аминь. Господи, помилуй. (12 раз)
Слава, и ныне: Приидите, поклонимся Цареви нашему Богу.
Приидите, поклонимся и припадем Христу, Цареви нашему Богу.
Приидите, поклонимся и припадем Самому Христу, Царевн и Богу нашему.
Псалом 83
Коль возлюблена селения Твоя, Господи сил! Желает и скончавается душа
моя во дворы Господни; сердце мое и плоть моя возрадовастася о Бозе
Живе. Ибо птица обрете себе храмину, и горлица гнездо себе, идеже положит
птенцы своя; олтари Твоя, Господи сил, Царю мой и Боже мой. Блажени
живущии в дому Твоем, в веки веков восхвалят Тя. Блажен муж, емуже есть
заступление его у Тебе, восхождения в сердцы своем положи. Во юдоль
плачевную, в место еже положи: ибо благословение даст законополагаяй.
Пойдут от силы в силу, явится Бог богов в Сионе. Господи Боже сил, услыши
молитву мою, внуши, Боже Иаковль. Защитниче наш, виждь, Боже, и призри
на лице Христа Твоего. Яко лучше день един во дворех Твоих паче тысящ;
изволих приметатися в дому Бога моего паче, неже жити ми в селениях
грешничих.
Яко милость и истину любит Господь, Бог благодать и славу даст: Господь
не лишит благих, ходящих незлобием. Господи, Боже сил, блажен человек,
уповаяй на Тя.
Псалом 84
Благоволил еси, Господи, землю Твою, возвратил еси плен Иаковль. Оставил
еси беззакония людей Твоих, покрыл еси вся грехи их. Укротил еси весь
гнев Твой, возвратился еси от гнева ярости Твоея. Возврати нас, Боже
спасений наших, и отврати ярость Твою от нас. Еда во веки прогневаешися
на ны, или простреши гнев Твой от рода в род? Боже, Ты, обращься, оживиши
ны, и людие Твои возвеселятся о Тебе. Яви нам, Господи, милость Твою,
и спасениие Твое даждь нам. Услышу, что речет о мне Господь Бог: яко
речет мир на люди Своя, и на преподобныя Своя, и на обращающия сердца
к Нему. Обаче близ боящихся Его спасение Его, вселити славу в землю
нашу. Милость и истина сретостеся, правда и мир облобызастася. Истина
от земли возсия, и правда с небесе приниче. Ибо Господь даст благость,
и земля наша даст плод свой. Правда пред Ним предъидет, и положит в
путь стопы своя.
Псалом 85
Приклони, Господи, ухо Твое, и услыши мя, яко нищ и убог есмь аз.
Сохрани душу мою, яко преподобен есмь: спаси раба Твоего, Боже мой,
уповающаго на Тя. Помилуй мя, Господи, яко к Тебе воззову весь день.
Возвесели душу раба твоего, яко к Тебе взях душу мою. Яко Ты, Господи,
благ и кроток, и многомилостив всем призывающим Тя. Внуши, Господи,
молитву мою, и вонми гласу моления моего. В день скорби моея воззвах
к Тебе, яко услышал мя еси. Несть подобен Тебе в бозех, Господи, и
несть по делом Твоим. Вси языцы, елики сотворил еси, приидут и поклонятся
пред Тобою, Господи, и прославят имя Твое. Яко велий еси Ты, и творяй
чудеса, Ты еси Бог един. Настави мя, Господи, на путь Твой, и пойду
во истине Твоей; да возвеселится сердце мое боятися имене Твоего.
Исповемся Тебе, Господи Боже мой, всем сердцем моим, и прославлю имя
Твое в век. Яко милость Твоя велия на мне, и избавил еси душу мою
от ада преисподнейшаго. Боже, законопреступницы восташа на мя, и сонм
державных взыскаша душу мою, и не предложиша Тебе пред собою. И Ты,
Господи Боже мой, щедрый и милостивый, долготерпеливый и многомилостивый,
и истинный, призри на мя и помилуй мя, даждь державу Твою отроку Твоему,
и спаси сына рабы Твоея. Сотвори со мною знамение во благо, и да видят
ненавидящии мя, и постыдятся, яко Ты, Господи, помогл ми и утешил
мя еси.
Сотвори со мною знамение во благо, и да видят ненавидящий мя, и постыдятся,
яко Ты, Господи, помогл ми и утешил мя еси.
Слава Отцу и Сыну и Святому Духу, и ныне и присно и во веки веков.
Аминь.
Аллилуйа, аллилуйа, аллилуйа, слава Тебе, Боже. (Трижды)
Господи, помилуй. (Трижды)
(Если Великий пост, читаем кафисму, когда это положено, затем поем
тропарь, гл. 8:
Иже в девятый час нас ради плотию смерть вкусивый, умертви плоти нашея
мудрование, Христе Боже, и спаси нас.
Чтец - стих 1: Да приближится молитва моя пред Тя, Господи, по словеси
Твоему вразуми мя.
Хор: Иже в девятый час...
Чтец - cmux 2: Да внидет прошение мое пред Тя, Господи, по словеси
Твоему избави мя.
Хор: Иже в девятый час...
Если не Великий пост:)
Тропарь дня
Читаются тропари, назначенные в этот день церковным Уставом (Типиконом).
В будни читаепся тропарь святому, в воскресенье - воскресный тропарь
соответствующего гласа, в праздники - тропарь праздника.
Если положен один тропарь, он читается на "Славу", т.е.
сначала читается "Слава Отцу и Сыну и Святому Духу", затем
тропарь, после него - "И ныне и присно и во веки веков. Аминь".
"Иже нас ради рождеися..." (Богородичен). Если два тропаря,
тo первый тропарь читается после "Господи, помилуй", второй
- на "Слава". Если три тропаря, то тропарь важнейшего празднества
читается после "Господи, помилуй", а два других тропаря
читаются на часах попеременно на "Слава".
Слава, и ныне: Богородичен: Иже нас ради рождейся от Девы, и распятие
претерпев Благий, испровергий смертию смерть, и воскресение явлей
яко Бог, не презри, яже создал еси рукою Твоею; яви человеколюбие
Твое, Милостиве, приими рождшую Тя, Богородицу, молящуюся за ны, и
спаси, Спасе наш, люди отчаянныя.
Не предаждь нас до конца, имене Твоего ради, и не разори завета Твоего,
и не отстави милости Твоея от нас.
Авраама ради возлюбленнаго от Тебе, и за Исаака, раба Твоего, и Израиля
святаго Твоего.
Трисвятое, по Отче наш.
Кондак праздника
Читается всегда один кондак, назначенный в этот день церковным Уставом
(Типиконом). В случаях, определенных Уставом, несколько кондаков читаются
на часах попеременно.
[Если кондака нет, или Великий пост:
Видя разбойник Начальника жизни на кресте висяща, глаголаше: aщe не
бы Бог был воплощься, Иже с нами распныйся, не бы солнце лучи своя
потаило; ниже бы земля трепещущи тряслась, но вся терпяй, помяни мя,
Господи, во Царствии Твоем.
Слава: Посреде двою разбойнику, мерило праведное обретеся крест Твой:
овому убо низводиму во ад тяготою хуления, другому же легчащуся от
прегрешений, к познанию богословия. Христе Боже, слава Тебе.
И ныне: Агнца, и Пастыря, и Спаса мира, на кресте зрящи Рождшая Тя,
глаголаше слезящи: мир убо радуется, приемля избавление, утроба же
Моя горит, зрящи
Твое распятие, еже за всех терпиши, Сыне и Боже мой.]
Господи, помилуй. (40 раз)
Иже на всякое время и на всякий час, на небеси и на земли покланяемый
и славимый, Христе Боже, долготерпеливе, многомилостиве, многоблагоутробне,
Иже праведныя любяй, и грешныя милуяй, Иже вся зовый ко спасению обещания
ради будущих благ, Сам, Господи, приими и наша в час сей молитвы,
и исправи живот наш к заповедем Твоим, души наша освяти, телеса очисти,
помышления исправи, мысли очисти, и избави нас от всякия скорби, зол
и болезней, огради нас святыми Твоими ангелы, да ополчением их соблюдаеми
и наставляеми, достигнем в соединение веры и в разум неприступныя
Твоея славы, яко благословен еси во веки веков, аминь.
Господи, помилуй. (Трижды)
Слава, и ныне: Честнейшую Херувим и славнейшую без сравнения Серафим,
без истления Бога Слова рождшую, сушую Богородицу Тя величаем.
Именем Господним благослови, отче.
Иерей: Боже, ущедри ны...
Чтец: Аминь.
(Если Великий пост - молитва св. Ефрема Сирина: Господи и Владыко...)
Молитва св. Василия Великого
Владыко Господи, Иисусе Христе Боже наш, долготерпевый о наших согрешениях,
и даже до нынешняго часа приведый нас, воньже на животворящем древе
вися, благоразумному разбойнику, иже в рай путесотворил еси вход,
и смертию смерть разрушил еси, очисти нас грешных и недостойных раб
Твоих. Согрешихом бо и беззаконновахом; и несмы достойно возвести
очеса наша и воззрети на высоту небесную; зане оставихом путь правды
Твоея, и ходихом в волях сердец наших. Но молим Твою безмерную благость,
пощади нас, Господи, по множеству милости Твоея, и спаси нас имене
Твоего ради святаго, яко исчезоша в суете дние наши, изми нас из руки
сопротивнаго, и остави нам грехи наша, и умертви плотское наше мудрование,
да ветхаго отложивше человека, в новаго облецемся; и тебе поживем,
нашему Владыце и Благодетелю, и тако Твоим последующе повелением,
в вечный покой достигнем, идеже есть всех веселящихся Жилище, Ты бо
еси воистинну истинное веселие и радость любящих Тя, Христе Боже наш,
и Тебе славу возсылаем, со Безначальным Твоим Отцем, и Пресвятым и
Благим и Животворящим Твоим Духом, ныне и присно, и во веки веков.
Аминь.
Слава, и ныне. Господи, помилуй. (Трижды) Благослови.
Священник произносит отпуст.
Аминь.
Молитвы на каждый день